ilir vata

Ballkani nën politikën e nacionalizmit primitiv

Shkruan : Ilir  VATA

Egoizmi i disa politikanëve në rajonin e Ballkanit, kohët e fundit ka sjellë në fokusin e rajonit raste ekstreme si në Shqipëri, Serbi, Greqi dhe kryesisht në Maqedoni, madje në veriun e Kosovës po ndërmerren aksione konkrete ndaj shqiptarëve të atjeshëm, deri në atë masë sa shqiptarët po përballen me një spastrim të ri, ndërsa kryefamiljarët po bëjnë roje kodrave përreth. Kjo ekspoze njëfrazëshe, lë të kuptohet se qarqe të caktuara e kanë mbajtur lart ekstremizmin për gjatë gjithë këtyre viteve në treva të ndryshme të rajonit dhe në shënjestër kanë qenë flamujt, simbolet dhe territoret. Një shtet ndihet i fyer kur i preken pikërisht simbolet dhe në aspektin juridik të të drejtës ndërkombëtare është veprimi i parë nxitës që i paraprin ekstremizmit për aksione të mëtejshme. Nxitësit e ekstremizmit janë pikërisht, struktura që janë të lidhura me të kaluarën e afërt komuniste, apo mbrojtësit e zellshëm të komunizmit që gjithçka e kanë të lidhur me ta. Ndër to numërohen edhe politikanë, e kjo ndodh pikërisht në momentet elektorale, siç pame liderin ekstremist serb, që deklaron se “nuk e lëshojmë Kosovën, apo partinë ekstremiste greke që përmend Vorio-Epirin”. Edhe në Shqipëri ka tendenca të tilla madje subjekte të caktuara siç edhe janë quajtur të kuqtë, kanë në themel nacionalizmin e kombit…!

Që në fjalën komb, që lançohet nga këta ekstremistë, duket qartë se slogani është tipik komunist, …kombi im është më i mirë se i yti…! Vjen nga manifesti, atdhetarët i thonë atdhe. Këta mbështillen me flamuj dhe “qajnë” për bashkim trojesh thjeshtë për përfitime politike, apo fundja sa mund të tërheqin vota për të siguruar kolltukun e tyre të pritur apo të thyer. Imitime të tilla primitive janë prapambetje shkollash, botëkuptimesh, apo thjeshtë egoizma të paguara, që në fund të fundit ndikojnë sadopak në prishjen e vetë misionit të Ballkanit, për t’u integruar në Bashkimin Europian, apo për të ulur besueshmërinë e diplomacisë, që Ballkani noton ende në ujërat e vjetra.Burime të besueshme bëjnë me dije se ka dhe nga ata që kanë paguar në Gostivar për të djegur flamurin shqiptar, thjeshtë për të bërë një deklaratë për shtyp në Tiranë, apo për të nxitur të rinj në Burrel, apo Himarë për të djegur flamujt e shteteve fqinje. Në Maqedoni, ekstremistët u vetëquajtën “Majmunë”, në Shqipëri kanë vënë shkabën në supe, në Greqi me kazma gërmojnë në primitivizmin shekullor, e modele që ngjajnë njësoj me kanunin e Lekë Dukagjinit. Por siç edhe kanuni ka hapur plagë, nga paaftësia e sistemit të drejtësisë, ashtu edhe nacionalizmi po sjell probleme dhe së fundmi pak ditë më parë pati katër të vrarë e shumë raste të mëparshme. Notimi në ujëra të vjetër të vetë primitivizmit për të fituar benefice politike është jo vetëm amoral, por gjeja më e shëmtuar e politikanëve rajonalë e aq më keq të atyre shqiptarë, ku shqiptarët kanë qenë nën provën e padrejtësive territoriale.

Ballkani tashmë ka hyrë në një fazë krejt tjetër nga ajo që jemi mësuar të shohim, popujt tanë po bashkëjetojnë me njeri tjetrin dhe kultura, arti, muzika, veshjet, gjuha, kanë ndërsjellë vlera të përbashkëta dhe ngjashmëri të padiskutueshme. Vetëm këto 20 vite, ballkanasit kanë emigruar në të gjithë botën dhe kryesisht në Europë dhe tashmë ata bashkëjetojnë si europianë. Një nga problematikat sociale sot janë dyndjet e ndërsjella në të gjithë botën, falë lirive të individit dhe thyerjen e kufijve, apo lëvizjes së lirë. Edhe Ballkani, si më i vonuar në këtë aspekt për shkak të luftrave dhe të nacionalizmave ekstremistë, tashmë po shkëputet nga primitivizmi i kufijve dhe izolimit, e po lëviz i lirë. Kufijtë tashmë rrinë vetëm në kuptimin institucional, të sovranitetit territorial të garantuar nga konventat ndërkombëtare, por në kuptimin e lëvizjes, tregut dhe shkëmbimeve nuk ka më kufij.Nacionalistët tanë mediokër, egoistë dhe primitivë, thjeshtë për të përfituar politikisht, flasin “si e ëma e Zeqos në majë të thanës”, për kombe dhe flamuj, a thua se mbeti Ballkani në dorë të disa karagjozëve politikë. Nuk është flamuri shqiptar flamur demash, por i një atdheu që ka mbi të sakrifica sublime në tërë historinë, po ashtu edhe të vendeve fqinjë. Politikanët tanë që fshihen pas flamurit, kanë dalë nga kolltuku i pushtetit dhe shqiptarët i panë sesa e donin popullin, kur i rrjepin me korrupsionin thjeshtë për një të drejtë apo të mirë. Ishin ata shtetarë që na shitën vendin e punës në vend që atë ta fitonim me konkurs. Kemi blerë të drejtën tonë, kur ajo na takonte. Të dalësh nga drejtësia dhe të shkelësh të drejtat elementare të qytetarëve, nuk do të thotë gjë tjetër por të shkosh në gabime më të mëdha si ato të flamurit apo etnive ndër-rajonale.

Na e valëvitin flamurin sikur ne nuk jemi shqiptarë e në të vërtetë shqiptarët kanë varre për atdhe. Ky lloj demonstrimi jo vetëm është i shëmtuar, por dhe provokativ dhe më e keqja nuk qëndron në xhestet apo përfitimet vetjake, por te burimi i financimit, apo te të interesuarit që qëndrojnë pas tyre, që kanë të vetmin qëllim, destabilizimin e Ballkanit. Nëse BE, kërkon bashkëjetesë dhe standarde europiane, pa pretendime territoriale, planprishësit nxisin aty këtu vlera të tilla negative, thjeshtë për të qenë pengesë. Ka mendime të ndryshme përsa i përket financimeve, disa mendojnë se janë agjenturat e vjetra të komunizmit, të tjerë thonë se janë muhaxhedinet e këtij të fundit që përdorin flamurin shqiptar si flamur demash për të ndërsyer shqiptarët, fqinjët, apo provokuar vetë qytetarët ballkanas. Pseudodemokratë, apo pseudopolitikanë që kërkojnë përfitime politike te tabutë, janë njerëz që xhani u ka ngelur në skutat e të shkuarës, te babai spiun, apo te intriga e tij e pangopësisë apo babëzisë.

Bashkimi i shqiptarëve tashmë është bërë realitet, ata ndërsjellin shkëmbime dhe lëvizin të lirë. Sot shqiptarët kanë nevoja jetike, kanë nevojë të bëjnë shtetin e së drejtës, të garantojnë barazinë në treg, të jenë zot të pronës së tyre, të mos paguajnë me taksat e tyre persekutorë, të bëhen anëtarë të BE-së ku të kenë mundësi të jenë si të gjithë europianët. Me këta politikanë që ka Shqipëria, të inkriminuar nga e kaluara komuniste me krimet e sigurimit të shtetit, të korruptuar deri në grykë, ka të ngjarë të ikin dhe këta shqiptarë që kanë mbetur. Regjistrimi i popullsisë deklaroi shifrën 2.7 milionë të mbetur në Shqipëri dhe kjo është pasojë e politikës postkomunistë, që rëndom mund ti krahasosh me byronë politike të komunizmit. Zemra e shqiptarëve gulçon për bashkimin, mirëqenien, krenarinë, por politikanët tanë si ata që heshtin, si ata që nxisin nacionalizmat, kanë misionin e heshtur të përçarjes, skllavërisë së shqiptarëve, drejtimin e tyre me metoda diktatoriale. Brezat që vijnë, do të dinë se ç’vend do të zënë në histori këta pehlivanë të paguar të nacionalizmit primitiv, qofshin ata të “majmunëve” apo të “urithëve”. Nacionalizmi primitiv i përket të shkuarës.