ilir vata

BE nxit Shqipërinë për rezultate në rrugën e integrimit

Presidenti i Bashkimit Europian Herman Von Rompuy i bëri komentet në përfundim të takimit me presidentin shqiptar Bujar Nishani

Presidenti i Bashkimit Europian Herman Von Rompuy ftoi sot qeverinë dhe opozitën shqiptare të shfrytëzojnë momentin dhe të arrijnë rezultate konkrete në plotësimin e 12 kritereve të përcaktuara nga Komisioni Evropian.

Presidenti Rompuy i bëri këto komente në përfundim të takimit me presidentin shqiptar Bujar Nishani i cili nisi sot një vizitë tre ditore në Bruksel gjatë së cilës ai do të takohet me drejtuesit më të lartë të Bashkimit euroian dhe të Natos.

“Shqipëria mund të bëjë ende progres të mirë drejt qëllimit të saj për 2012. Respektimi për sundimin e ligjit përfshirë këtu luftën kundër krimit të organizuar dhe korrupsionit mbetet thelbësor. Integrimi europian- theksoi presidenti Rompuy - duhet të jetë një përpjekje e vërtetë kombëtare dhe një projekt gjithëpërfshirës” dhe se “angazhimi i vazhdueshëm dhe një dialog politik i qëndrueshëm e konstruktiv janë thelbesore për suksesin e Shqipërisë. Progresi konkret në rrugën drejt BE-së varet tërësisht nga Shqipëria dhe ecuria e saj për të arritur rezultate në reformat kyce”, nënvizoi presidenti i Bashkimit europian.

Nga ana e tij presidenti Nishani tha se Shqipëria “është e vetdijshme që ka arritur shumë, sic është e vetëdijshme për sfidat që e presin, dhe nevojën për të konsoliduar më tej arritjet si dhe të punojë më shumë për standarte më të larta”.

Në fillim të muajit tetor Komisioni europian do të publikojë raportin e tij mbi Shqipërinë si dhe do të japë vlerësimin e vet për statusin kandidat, i cili I është refuzuar dy herë në të shkuarën.