ilir vata

Miell makinës së kryeministrit

Berisha te hap dosjet e sigurimit te shtetit, vendi po lendon nga neodiktatura

Në Shqipëri dy ish të përndjekur politikë qëlluan sot me qese mielli makinën e kryeministrit Sali Berisha ndërsa ai po hynte në mjediset e brendshme të parlamentit ku sapo kishte nisur seanca e zakonshme e së enjtes.



Skënder Tufa, kreu i shoqatës së ish-të burgosurve politikë të Shqipërisë, dhe ish-i burgosuri, Agim Kollcaku u ndaluan menjëherë për t’u liruar pasi u morën në pyetje. Ata deklaruan se akti i tyre ishte një veprim simbolik për të protestuar ndaj braktisjes që sipas tyre i është bërë shtresës së ish të përndjekurve politikë.

Makina e kryeministrit Sali Berisha kishte ulur shpejtësinë për t’u kthyer drejt hyrjes së parlamentit kur mbi të ranë dy qese me miell. Skënder Tufa, kreu i shoqatës së ish-të burgosurve politikë të Shqipërisë, dhe ish-i burgosuri, Agim Kollcaku e kishin menduar që më parë këtë veprim ndërsa cdo ditë të enjte grumbullohen para parlamentit për të protestuar ndaj premtimeve të pambajtura sipas tyre për dëmshpërblimin që u takon. Ata thonë se janë pa punë dhe pa asnjë mbështetje financiare

"Ne ishim të parapërgatitur dhe ne të dy vetëm, qëlluam me miell, në mënyrë simbolike. Eshtë Brenda normave demokratike. Të burgosurit politik kanë qenë gjithnjë fillimi I zërit të ndërgjegjes së popullit shqiptar", deklaroi Tufa.

Të dy u ndaluan menjëherë nga policia, ndërsa Tufa thotë se është goditur nga pjestarët e eskortës së kryeministrit: "Jam qëlluar barbarisht nga eskorta e kryeministrit. Më kanë marrë zvarrë, më kanë grisur, më kanë thyer gjyslykët, orën, e jam gjakosur".

NUk është hera e parë që përfaqësues të të përndjekurve gjejnë mënyra individuale për të reaguar. Pak kohë më parë u sulmua në rrugë edhe kryetari I Komisionit të Ligjeve demokrati Ilir Rusmali.

Tufa e Kollcaku u lanë të lirë pasi u morën në pyetje për afër dy orë. Policia nuk dha asnjë variant zyrtar mbi ngjarjen ndërsa kryeministri vazhdoi qetësisht pjesmarrjen në seancën e parlamentit ku ratifikimi I një marrëveshjeje financiare për ndërtimin  e by pass-it të Fierit u shoqërua me debate të gjata e të ashpra mes palëve për investimet në infrastrukturë.